Den omvendte adventskalenderen handlar om å gi noko til nokon som verkeleg treng det.
– Me gjer husarbeid heime, og får litt pengar i frå foreldra vår. Dei pengane gir me vidare til ein barneheim i Kenya, forklarar Marie Hatlevik (10).
Leirvik skule har i lang tid hatt eit samarbeid med barneheimen i Kenya.
Vil dela jula med andre
Elevane ved Leirvik skule har valt å ha denne ordninga for å hjelpa dei som treng det. Slik at barna på barneheimen i Kenya skal få høve til å gå på skule, og få nok mat.
– Alle barn har rett til å gå på skule, men det er framleis ikkje slikt alle plassar i verda, seier Raehd Alrifai.
– Det som er fint med julekalenderen er at me ikkje held jula for oss sjølv, men at me deler jula med andre barn, seier Marie.
Likar godt kalender-ordningane
Alle er einige om at kalender-ordningane deira er heilt topp.
– Det er bra, fordi pengane går til ei god sak. Då blir det mindre urettferdig. Me har mobil og ipad, medan dei har nesten ingenting, seier Hanna Nerhus Haukefær.
– Det er bra at me hjelp, slik at dei har råd til nok mat, seier Emma Sofie Larsen.
Raehd fortel at han ikkje har budd i Noreg heile livet.
– Eg har budd i Syria. Difor synest eg det er viktig at me hjelp dei som treng det.
Elevane synest andre skular burde gjera som dei – å ha omvendt julekalender. Skulen har også gjort andre ting for å gi pengar til dei som treng det. I fjor hadde dei temaveke og open dag, der dei samla inn pengar til borna i Kenya.
