Tips til andre barn
- Det er lurt å ha med ein venn, slik at de kan passa på kvarandre.
- Sjekk at det er trygge omgivnader, om du skal stupa og hoppa.
- Sjekk om det er vaksne der du er, viss noko skjer.
– Eg har aldri vore i ein situasjon der eg har hatt bruk for det me lærte på livredningskurset, men det er veldig godt å vita at eg har lært det i forkant, seier Martine Jensen (11).
Kasper Vadel (12) og Simon Holm (12) nikkar enig.
Dei tre klassekameratane var nyleg på introkurs i livredning via Redningsselskapet i Horten. Der fekk dei både teoretisk og praktisk opplæring i livredning utandørs – der dei fleste ulukkene faktisk skjer.
Symjing, sjølvberging og livredning
– Først lærte me litt teori om korleis me kan redda andre og vårt eige liv, og så gjekk me ut å gjorde det i praksis, seier Kasper.
Introkurset dei har tatt, møter kompetansemåla som er knytt til symjing, sjølvberging og livredning i læreplanen for kroppsøving i grunnskulen. Om dei vil kan dei byggja på med grunnkurs, der dei lærer enno meir.
Kasper, Martine og Simon fortel at dei var gjennom fleire øvingar på kurset.
– Me lærte korleis me kan slappa i vatnet når me blir sliten og korleis me kan flyta. Det er fleire forskjellige måtar å redda folk i vatnet på, mellom anna ved å bruka livbøyer eller ein SUP, seier Simon.
