– Fleire skular burde hatt skulehage

Berre ti kommunar i Noreg seier dei har skular med sin eigen skulehage der elevane kan dyrka mat til skulekjøkkenet.

Rustad skole i Oslo kommune er ein av dei heldige som har sin eigen skulehage.

Den grøne fargen gjer meg glad, seier Fredrik og kikar ut over skulehagen. Det er godt å kome hit og høyre vinden.

Skulehagen hjelper elevane å bli kjent med naturen. Gjennom leik og læring får dei kunnskap om alt frå næringsrik mat, økologisk, kortreist, jordvern og rettferdig berekraft.

Må luke og passe på: Sebastian Kärtstedt (10), Aliza Butt (10) og Amelia Asar Chadnry (11) ser til at plantene har det fint.

Gøy å sjå plantene vekse

  1. trinn har sine eigne bedd, og ein kan sjå at små, grøne stilkar veks opp frå molda.

Vi dyrkar forskjellige ting. Klassa mi har planta grønkål, seier Amelia.

Nokre dyrkar poteter, sukkererter, graskar og andre ting, seier Sebastian.

I fjor når vi planta graskar, var det nokon som fekk squash, seier Amelia.

Lærer på ein annan måte

Å flytte klasserommet ut er noko alle synest er ekstra moro.

Eg synest det er gøy å plante, og sjå plantene vekse, seier Sebastian.

Når ein får dyrke sin eigen mat lærer ein på ein annan måte om plantane og alt som hører med, fortel Victor.

Smakar ekstra godt

Skulehagen skal vere med på å auke interessa for mat og naturen. Når ein får vere med heilt frå starten set ein ekstra pris på maten.

Når pappa lagar lefser, og eg får vere med å hjelpe han, smakar det ekstra godt. Slik er det med maten vi dyrkar også. Det er kjekt å vere med å hjelpe til i skulehagen for då smakar det ekstra godt, seier Fredrik.

Ser fram til innhaustinga

Etter sommarferien skal dei hauste inn alt dei har sådd. Det ser dei fram til.

Alle på skulen får ete det vi har dyrka. Då lagar vi mat på skulekjøkkenet, fortel Sebastian.

– Burde fleire skular fått dette tilbodet?

Fleire skular burde hatt skulehage, for det er fint å kome seg ut i naturen, seier Aliza.

Ja, og så får kanskje nokon lyst til å prøve å dyrke sin eigen mat heime også, seier Amelia.

Har skulen din skulehage?

Har skulen din skulehage?

Ja14
Nei15
Ikkje på skulen, men utanfor4
Veit ikkje2
Kunne tenkt meg3
Svar totalt: 38
– Eg synest det er gøy å plante, og sjå plantene vekse, seier Sebastian Kärtstedt (10). Saman med Aliza Butt (10) og Amelia Asar Chadnry (11).

Dette er dei ti kommunane som har skulehage:

  • Tingvoll
  • Grimstad
  • Seljord
  • Gloppen
  • Stavanger
  • Bergen kommune
  • Høylandet
  • Fredrikstad
  • Oslo kommune
  • Aurskog-Høland

Alle kommunane er spurt, og 200 kommunar har svart på undersøkinga til Framtida.no.

Plantene må ha vatn: Victor Arstad Dalbakk (10), Fredrik Halland (10) og Darian (11) steller med plantene.