I følgje ny forsking er det no mange fleire kvinnelege forskarar som dukker opp på barneteikningar. På 1960-talet var det knapt ei einaste dame å sjå, men i 2016 dukka det opp ein tredjedel kvinner, skriv Science News.
– Mykje har endra seg sidan 1960-talet, seier David Miller. Han har jobba med undersøkinga.
5000 teikningar
I åra mellom 1966 og 1977 var det 5000 barn som teikna ein forskar. Av desse 5000 teikningane, var det berre 28 barn som teikna ei kvinne.
Men, dette endra seg i åra mellom 1985 og 2016 – då var det heile 28 prosent som teikna kvinnelege forskarar.
Tenåringar
Jenter teiknar kvinner 70 prosent av tida når dei er 6 år. Dette endra seg innan jentene fyller 16 år. Då teiknar nemleg 75 prosent av jentene menn når dei tenkjer på ein forskar.
– Det er viktig at lærarar og foreldre viser barn og unge ulike døme på både mannlege og kvinnelege forskarar, seier Miller.