Id al-fitr er ei islamsk høgtid på den første dagen i månaden shawwal og markerer slutten på fastemånaden ramadan. Når sola går ned fredag kveld, samlast muslimar i Noreg for å bryta ein månads lang faste saman med familie, venner og naboar.
– Dei fleste går til moskeen før dei samlast til feiring, fortel Rania Alnahi til Forskning.no.
Ho har fasta frå soloppgang til solnedgang den siste månaden.
– Ramadan er ein slags årleg service, både for kropp og sjel, seier ho.
Målet med ramadan er å øva på sjølvdisiplin og bli meir medviten om trua si. Samtidig har det vorte meir vanleg med ting som minner om jul – som gåvekalendrar og pynt.
Får gåver
– Barna får gåver. I år har dei også fått ein kalender som tel ned dagane til id, fortel ho.
Ho synest det er litt både bra og litt rart at id blir meir og meir som ein kjøpefest, også i Noreg. No sel butikkar pynt til id. Det finst til og med eigen sjokolade og brus med ramadan-design.
– Samtidig kan det vera fint, spesielt for barn. Eg pyntar til id på same måte som mange pyntar til jul, seier ho.
