Du har kanskje kasta ut juletreet, men for millionar av kristne var det først jul i går.
Det er ikkje fordi dei trur Jesus blei fødd 7. januar, men fordi dei følger ein annan kalender.
Ifølge Al Jazeera dreier det seg om 250 millionar menneske i land som Egypt, Russland og Etiopia.
Kyrkjene følger ulike kalendrar
I kristendommen er det tre hovudretningar: protestantismen, katolisismen og den ortodokse kyrkja. Ortodoks betyr rettruande.
Kalenderen vi bruker i Noreg i dag, er den gregorianske kalenderen. Det har vi gjort sidan år 1700. Før det brukte vi den julianske kalenderen.
Mange ortodokse kyrkjer følger framleis den julianske kalenderen når det kjem til merkedagar i året. Ifølge denne kalenderen er første juledag 7. januar.
Ukraina bytte dagen for julefeiringa
Ukraina pleidde å feire jul 7. januar. Men i 2023 bestemte dei seg for å endre til 25. desember, slik at dei feirar samtidig som dei fleste land i verda. Endringa gjer at Ukraina ikkje lenger feirer jul same dagen som Russland.
