Sidan 1997 har Barnas fredsprisfest vore på det offisielle programmet til Nobels fredspris. Her er det barn som arrangerer og berre skuleklassar kan melde seg på som publikum.
Framtida Junior snakkar med sjuandeklassingane Maya Wisniowska Hussein (12), Joanna Fonkalsrud (12), Philip Møller Dybvik (12) og Marie Høberg Skarheim (12) som har vore med å planleggje festen sidan slutten av september.
– Det var då vi starta med litt små idear, og så heldt vi fram å kome med små idear og leggje på dei små ideane til dei store ideane. Til slutt så vaks det til å bli det vi har i dag, seier Philip.
«Iskrem på pinne»
Fredsprisfesten hadde soloinnslag frå 14-åringen Aryaan Mansoor som kom med sommarhiten «Iskrem på pinne», og 16-åringen Olivia Gnananantham Husabø som kom til finalen i the Voice.
I tillegg var det danseinnslag frå Subsdans, teater frå fleire av deltakarane, kammermusikk frå Kvartett og song frå Bislett Guttekor.
– Kva er det kulaste de skal vise fram i dag?
– Det er eit skodespel, som handlar om korleis det er å vere barn i Venezuela. Det er kanskje ikkje så kult, men det er noko nytt, seier Maya.
– Sluttnummeret er jo ofte det beste, legg ho til.
– Kjemper for ei viktig sak
Årets fredsprisvinnar er María Corina Machado, som er frå Venezuela.
– Kva tenkjer de om årets fredsprisvinnar?
– Vi tenkjer at det er fint at ho vann, for ho kjempar for ei veldig viktig sak. Og så er det veldig fint at ei kvinne vann, då, seier Marie.
– Det er lenge sidan ei kvinne har vunne, stemmer Philip i.
I media har fleire sagt at dei er ueinige i at María Corina Machado skulle få prisen, men desse fire ser det som er bra med at ho vann.
– Ho har gjort ein bra kamp for demokrati i Venezuela, så då støttar vi det, seier Joanna.
– Mange ser på det litt negative om ho, men vi tenkjer at vi skal hylle ho og lage ein fest for ho for det ho har gjort som er bra. Vi må tenkje på at vi har folk som ho som kjempar, og som vinn fredsprisen. Det er veldig bra, seier Maya.
Situasjonen i Venezuela
Joana fortel om korleis livet er i Venezuela.
– Det er diktatur i Venezuela og det er mange som har dårleg råd. For eksempel er det berre 40 prosent som går på skule av barn, og lærarar må ha tre-fire jobbar for å overleve og få nok mat, seier ho.
– Kva er det som er viktig med demokrati?
– At folket bestemmer og at med diktatur så kan det bli for mykje makt for ein person. Demokrati er at makta blir fordelt utover, og det lagar eit betre mangfald og eit betre samfunn, seier Philip.
– Ein kan jo bli litt gal av å ha så mykje makt. Tenk på kva ein kan gjere. Men demokrati får alle til å føle at dei er med, sjølv om ditt parti ikkje vann, så har du vore med på å gjere noko, seier Maya.
Dottera tar imot prisen
Draumeplanen var at Machado skulle kome til fredsprisfesten, men ho har levd i skjul i over eitt år. I morgontimane i dag vart det stadfesta av Nobelkomitéen at Machado ikkje klarte å kome til Noreg i tide.
– Var det litt skuffande at Machado ikkje kom sjølv?
– Ja, så klart, seier dei i kor.
Men dottera, Ana Corina Sosa, kjem for å prate med barna på scena, og det hjelper veldig på.
Dei var klare over at Machado sjølv kanskje måtte halde ein låg profil.
– Ho lever i skjul, og eg trur ho gjer det mest for sin eigen tryggleik, for at ho ikkje skal bli oppdaga. Og om det er nokre spionar noko stad i Noreg så kan det utvikle seg til eit veldig stort problem for Machado, seier Philip.
– Ja, for styresmaktene vil jo eigentleg ikkje ha ho, seier Joanna om Venezuela.
– Vi er uansett glade for at dottera kjem, seier Maya.
Fått nye venar
Maya, Joanna, Philip og Marie har berre gode ting å seie om korleis det har vore å arrangere Barnas fredsprisfest.
– Det er veldig, veldig spanande, seier Philip.
– Ja, kjempegøy og vi kosar oss, seier Joanna.
– Ein opplever nye ting og får nye venar, seier Maya.
– Og det blir veldig kult show i dag, avsluttar Marie.
