– Er det mange du kjenner på din alder som er interessert i politikk?
– Nei, det er ingen, seier May Sami på telefonen.
May si interesse for politikk starta for lenge sidan, sidan mor hennar er politikar. Ho har eit spesielt sterkt minne av å vere med mora på eit møte, der May teikna plakatar for streik.
Vil gjere det beste for Noreg
Gjennom mora fann May ut at det var Miljøpartiet Dei Grøne (MDG) som ho likte best, og derfor ville ho gjerne bli med i Grøn Ungdom. Det er ungdomspartiet til MDG. Alle partia har sine eigne ungdomsparti.
– Eg hadde lyst til å halde fram med politikk, for eg tykkjer det er veldig viktig, seier May.
For ho handlar det om å finne måtar å leve godt på i samfunnet, og å styre landet på best mogleg måte.
– Eg ønskjer å bli statsminister, eller i alle fall politikar, fordi eg er veldig glad i Noreg og har lyst å gjere mitt beste for å gjere Noreg til eit godt land, med god påverknad på andre land, seier May.
Klima og mobbing
Å ta tak i klimakrisa er noko May vil at Noreg skal fokusere på.
– Akkurat no er kloden vår i fare, seier ho.
Sjølv om ho vil jobbe for klima, meiner ho ikkje at dette er det einaste Noreg skal gjere noko med.
– Men verda smelter i kaos, og viss vi ikkje tar tak no, kan det vere for seint, seier May.
– Er det nokre skulesaker du brenn for?
May fortel at ho har veldig lyst til å setje ein stoppar for mobbing.
– Lærarar og andre som jobbar på skulen må vere flinkare til å vere der når mobbing skjer, seier ho.
Ho syns det blir for lite arbeid mot mobbing, når det meste som skjer er at ein ansvarsperson ber barna seie unnskyld til kvarandre og gi ein klem.
– Det same skjer neste dag, det er ikkje «sunshine and rainbows». Lærarane må faktisk ta tak i det, seier May.
Eit minne for livet
May melde seg inn i Grøn ungdom rett før sumaren, og var med på sin første sumarleir.
– Kva lærer du av å vere med i eit ungdomsparti?
– Eg har lært at eg kan vere meg sjølv og seie meiningane mine høgt. Og eg har lært at meiningane mine skal eg kunne seie høgt til kven som helst, seier May.
Ho seier også at ho likar godt å lære om all politikk, på alle sidene.
– Personleg syns eg at det ikkje er heilt godt å vere einig i høgre-sida, men det handlar om preferansar, seier ho.
På sumarleiren fekk ho vere med på mykje gøye aktivitetar, som bading og mykje spel.
– Du blir fort kjent med alle saman, uansett om de er venar eller ikkje. Det var min første sumarleir, og det trur eg at eg kjem til å hugse heile livet mitt, seier May.
