Denne saka vart først publisert hjå systeravisa vår, Framtida.no.
Tysdag denne veka gav myndigheitene i Litauen melding om at forsvaret og skulen går saman for å læra 22 000 litauarar opp i å byggja og fly dronar, melder The Guardian og fleire andre internasjonale medium.
Tiltaket skal styrke den sivile beredskapen med tanke på Russland. I sommar har det nemleg kome dronar inn i Litauen som ein mistenkjer kjem frå Russland.
Leia av skyttarforbundet
I Litauen satsar dei no stort på droneteknologi og vil bruka nærare 40 millionar norske kroner på droneutstyr og system. Allereie i september opnar kontrollsenter i tre litauiske byar, medan seks fleire treningssenter skal opna dei neste tre åra.
Planen er å auka den tekniske kompetansen og at 15 000 vaksne og 7000 barn skal få droneopplæring innan 2028.
Treninga av dei yngste skal gjennomførast utanom ordinær undervisning av Litauens skyttarforbund.
– Dei yngste deltakarane vil gjennomføra enkel dronebygging og -manøvrering gjennom leik og eksperiment. Ungdomsskuleelevar vil læra grunnleggjande programmering saman med innandørs dronemanøvrering og -bygging, seier Tomas Godliauskas, viseminister for forsvarsdepartementet i Litauen.
