Dei nye reglane betyr til dømes at ein lærar kan føra ein elev ut av klasserommet dersom det blir så mykje uro at det ikkje går an å ha ein vanleg skuletime. Læraren kan også ta mobilen frå ein elev som filmar andre i ein situasjon der det ikkje er greitt, skriv NRK.
Slike ting har lærarane ikkje hatt lov til å gjera før, ifølgje opplæringslova. No blir reglane endra for å gi lærarar meir hjelp til å skapa ro og tryggleik i klasserommet.
Ein trygg stad
– Det er på tide at lova vernar undervisninga for den store felleskapen i klasserommet. Skulen skal vera ein trygg stad der både elever og tilsette trivst og lærer, seier kunnskapsminister Kari Nessa Nordtun til NRK.
Dei nye reglane kjem i tillegg til det som allereie gjeld: at tilsette kan gripa inn for å hindra at nokon blir skadde, eller at noko blir øydelagt.
