Donald Trump vil vere presidentkandidat i 2024

Den tidlegare presidenten lanserte kandidaturet sitt på eit veljarmøte tysdag.

– På fire korte år hadde alle det bra. Alle blomstra som aldri før. No er vi eit land der det går nedover.

Det sa Donald Trump då han annonserte at han vil bli president på nytt i USA.

Trump har lagt opp til å bli president på nytt ei stund no. Han promoterte over 300 kandidatar i mellomvalet til Kongressen. Sjølv om færre av desse vann enn venta, var det ein klar beskjed om at han involverer seg meir i politikk.

Presidentvalet i USA er ikkje før i 2024, men kandidatar seier vanlegvis frå i god tid på førehand.

Dersom dei skal representere Det republikanske eller Det demokratiske partiet må dei også først veljast som kandidat for det partiet. Donald Trump stiller for Det republikanske partiet, på same måte som han gjorde i 2016 og 2020.

Konkurranse

Den andre store republikanske kandidaten er Ron DeSantis. Han er guvernør i delstaten Florida.

DeSantis er ein av politikarane bak Don’t say gay-lovforslaget, eit forbod som gjorde at lærarar i delstaten ikkje kunne prate om seksualitet i klasserommet.

Foreløpig gjer han det betre på meiningsmålingar i Florida enn Donald Trump.


Foto: Gage Skidmore / CC BY-SA 2.0-lisens