– Det var slitsamt, skummelt, stressande og gøy på same tid. Me fekk aldri fred frå befalet, og me visste aldri kva me gjekk til av utfordringar, skriv Margrethe Røed i ein e-post til Framtida Junior.
Programleiaren er med i årets sesong av «Kompani Lauritzen» på TV 2, som vart spelt inn i sommar. Ho fortel at deltakarane kunne gå timevis med megatunge sekkar, at dei måtte halda fullstendig orden og gjera mange ting dei var redde for.
– Det største ønsket vart til slutt å få litt skryt av befalet som var så strenge med oss heile tida, seier ho.
Befalet er leiarane i militæret, og leiarane til deltakarane i Kompani Lauritzen. Noko av det beste med opphaldet hennar, var å bli kjend med dei andre deltakarane. Ho greidde også å overraska seg sjølv.
– Heilt vilt kor mykje me har å hente av energi
– Å kjenna at eg faktisk greidde å pusha meg til ting eg aldri trudde eg kom til å gjera, var ei befriande kjensle.
Ho fortel at ho lærte mykje av opphaldet på Setnesmoen. Mellom anna at ein eigentleg ikkje er sliten når ein trur at ein er det.
– Når ein verkeleg er utsliten, har me kanskje berre brukt 20 prosent av det kroppen har å gi. Det er heilt vilt kor mykje me har å hente av energi som me trur me ikkje har, fordi me lever så avslappa liv til vanleg.
Merkeleg nok elska Margrethe å vera i det strenge regimet. Men ikkje nok til å endra yrke.
– Eg trur at eg har det best i den jobben som eg har. Eg hadde nok aldri blitt ein tøff nok soldat.
