Dei to siste åra har dei reist rundt for å klovne for barn på asylmottak og i flyktningleirar. No dreg klovnane Pip, Luna og Fasit til Malawi. Landet i Afrika er eit av verdas fattigaste land. Der er det blant anna vassmangel og barneekteskap. Der treng barna all den støtte dei kan få.
– Vi er veldig flinke til å gjere dumme ting og skape problem for oss sjølve som barna må hjelpe oss ut av, seier klovnen Fasit.
Barna er heltane
Klovnane er opptekne med å få med alle barna i forestillinga dei har. Klovnane må alltid ha hjelp frå barna, for det er dei som er heltane i forestillinga deira.
Fasit fortel at nokre gongar møter dei barn som er heilt blokkerte. Dei får ikkje kontakt. Barnet sit der, men er ein heilt annan stad. Mange har opplevd for mykje vondt, fortel han.
– Om barnet på slutten av forestillinga kjem fram og går på gummistrikken som ligg på bakken. Då jublar og klappar alle. Om barnet vaknar og smiler, så er det verdt heile forestillinga. Det skjer innimellom og det er veldig vakkert, seier han.
Artikkelen held fram etter bilete
Barna kan ikkje velje
Barna og klovnane møtast i leiken, men har forskjellige verkelegheiter.
– Vi kan dra, men dei må bli igjen.
– Vi kan når som helst gå ut av verkelegheita. Eg har ei seng ein
annan stad. Dei har ikkje ein annan stad, dei kan ikkje velje, seier Fasit.
