9 tips for ein meir klimavennleg kvardag

Noko som kan redusere klimagassutslepp, er om vi held ved like, reparerer og deler på dei tinga vi allereie eig. Slik varer tinga våre lengre og vi treng ikkje produsere meir enn nødvendig.

Veldig mykje av det vi kastar av elektronikk, klede og plast, forsvinn ut av Noreg. Då endar det ofte opp i fattige land som ikkje klarer å handtere søpla på ein klimavennleg måte.

Sorter søpla når du først kastar noko. Ved at vi gjere det, får vi resirkulert det vi kan. Samstundes legg det at vi er flinke til å sortere press på at systemet for resirkulering og ombruk skal bli endå betre.

Barn og unge kan ha eit ønskje om å ha dei nyaste tinga og det som er in, men ein treng faktisk ikkje å kjøpe heilt nytt for å følgje trendar. I dag får ein nemleg tak i det meste på bruktmarknaden.

Eitt av dei største utsleppsområda for klimagassar er mat. Når det gjeld dette området, kan ein vere klimavennleg ved å velje vegetarisk mat og norske råvarer som er i sesong.

Barn og unge kan utfordre dei heime til å tenkje nytt og ta val som er bra for klima og miljø. Ein kan til dømes stille spørsmål som «Må vi til utlandet på ferie, eller kan vi gjere noko anna?» og oppmode til å stemme på politiske parti som vil gjere samfunnet meir klimavennleg.

I staden for å bli køyrt med bil, er det fint å gå eller sykle dei gongane reiseavstanden er kort nok til det. Vel heller kollektivtransport enn bil for lengre reiser.

Det kan vere lurt å snakke om kva som eigentleg er viktig i livet. Kanskje er ikkje svaret de store, lite klimavennlege forbruket vårt, men heller opplevingar, personane vi er glad i og god helse. Det er enklare å ta klimavennlege val om fleire står saman om det.

Ved å til dømes vere med i ein miljøorganisasjon, kan ein få betre forståing for kva som skjer i samfunnet når det gjeld klima. I tillegg kan ein vere med å påverke politikken.