Sudan
- Hovudstad: Khartoum
- Innbyggjartal: 50,4 millionar
- Statsform: republikk
- Språk: arabisk og engelsk
- Nasjonaldag: 1. januar
Kjelde: Vesle norske leksikon
I landet Sudan i Afrika er det borgarkrig. Borgarkrig er ein krig som blir kjempa mellom ulike grupper i eitt land.
Borgarkrigen i Sudan har ført til at over 33 millionar menneske treng humanitær hjelp. Humanitær hjelp vil seie hjelp til menneske som er i ei krise. Det kan til dømes vere hjelp til å få reint vatn, varme klede og helsehjelp.
Sidan krigen starta har hjelpeorganisasjonen Redd Barna forsøkt å gi humanitær hjelp ved å skaffa barna i Sudan viktige vaksinar. Dette har dei ikkje lukkast med før no.
Livreddande hjelp
No har Redd Barna frakta 18 tonn med vaksinar inn i landet. Det vil seie at over 24 000 barn vil bli vaksinerte, skriv Verdens Bedste Nyheder.
Å bli vaksinert vil si at ein blir beskytta mot bestemte sjukdommar. Barna i Sudan blir no vaksinert mot sjukdommane polio, meslingar, stivkrampe, difteri, leverbetennelse og gul feber.
Barnevaksinasjon er ein av dei viktigaste måtane å hindre at barn døyr på.
