Artikkelen vart fyrst publisert i Framtida Junior si systeravis, Framtida.no.
Det britiske parlamentet har avvist eit forslag om å forby sosiale medium for born under 16 år, skriv BBC.
Forslaget blei stemt ned med 307 mot 173 røyster.
Forslaget fekk støtte av det britiske overhuset i januar, etter at Australia innførte eit liknande forbod i fjor.
Utdanningsminister i Storbritannia, Olivia Bailey, bad parlamentarikarane stemme mot eit forbod, og i staden støtte fleksible restriksjonar.
– Fleire ønsker eit forbod, men andre åtvarar om at det kan drive barn inn på mindre regulerte delar av internett, sa Bailey i parlamentet.
I staden ønskjer ho ei offentleg høyring for å avgjere vegen vidare.
Baileys forslag fekk støtte. Dermed kan det framleis kome restriksjonar og mindre omfattande forbod i framtida.
Forslaget har fått kritikk. Mellom anna har Liberaldemokratanes talsperson for utdanning, Munira Wilson, kalla forslaget dårleg.
– At styresmaktene ikkje innfører eit forbod mot skadelege sosiale medium, er rett og slett ikkje godt nok. Vi må vite at høyringa ikkje fører til forseinkingar og sløsing av tid.
