Under Barnas fredsprisfest kom Ungdomsavisa.com for å dekkje arrangementet. Her fekk dei intervjue sjølvaste kronprinsesse Mette-Marit.
Anne Bergan-Skar (15), Karolina Maria Wojtyla (14), Jon Mathias Øvereng-Bakk (13) og Ole Erik Sander (13) kom tidleg til presseområdet, og sa seg villige til å svare på nokre spørsmål frå Framtida Junior.
Intervjua kronprinsessa
Under Nobels fredsprisveka har ulike lag dekka forskjellige arrangement. Anne, Karolina, Jon Mathias og Ole Erik var i år med og dekka Barnas fredsprisfest. Dei har òg intervjua fleire andre personar.
– Vi intervjua mora til María Corina Machado, seier Karolina.
I tillegg fekk dei prata med presidenten av Panama, Jose Raul Mulino.
Då gjestane under Barnas fredsprisfest forlét scena, fekk Ungdomsavisa prata med kronprinsesse Mette-Marit.
Eit ulikt år
Ungdomsavisa.com er skuleavisa til Åmot ungdomsskole, der 8.–10.-klassingar får jobbe som journalistar og reporterar rundt i Noreg. Avisa har eksistert i 25 år.
– I fjor intervjua vi Hibakusha, overlevande frå atombombene i Japan, seier Anne.
Som 8.-klassingar har Ole Erik og Jon Mathias jobba i avisa i eitt år.
– Korleis er det å vere med i avisa?
– Det er spanande, seier Ole Erik.
– Det er eit ulikt år, legg Jon Mathias til.
