Seks løver, seks tigrar, to ørkengauper og ein afrikansk villhund vart seint førre veke sendt over grensa frå Kyiv i Ukraina til Polen. Det fortel talskvinna for Poznan Zoo, Malgorzata Chodyla til NTB.
Dyrehagen Poznan Zoo stod bak organiseringa for å få dyra trygt fram til ein ny heim.
Måtte ta store omvegar
Lastebilane med dei store dyra måtte ta store omvegar for å komma fram til Polen, for å unngå krigshandlingane som rasar fleire stader i Ukraina.
På den lange turen, traff sjåførane på russiske stridsvogner. Likevel greidde dei å koma seg fram til den polske grensa.
Reisa enda godt for desse dyra – men framleis er det mange att i Ukraina. Mange av desse treng hjelp.
Mange fleire treng hjelp
NTB skriv at det bur om lag 4.000 dyr i dyrehagar i Ukraina. Desse er mellom anna elefantar, kamelar og ein gorilla.
I tillegg til dei ville dyra, er det fleire familiedyr som no står i ein vanskeleg situasjon. Her i Noreg er det Mattilsynet som er ansvarleg for å kontrollera dyr som kjem som flyktningar saman med familien sin.
– Mattilsynet vil prøva å leggja til rette for at flyktningane frå Ukraina kan ta med seg familiedyra sine, utan at det skal medføra ein risiko for spreiing av sjukdommar til menneske og dyr i Noreg, skriv dei på heimesida si.
