Kor mange bur i Noreg?
- SSB oppgir 5 636 904 innbyggjarar per 28. september 2026.
- Deler me 307,7 millionar på 5 636 904 innbyggjarar, får me om lag 54,6 kroner per person.
Det er sett av 307,7 millionar kroner til kongehuset i statsbudsjettet. Deler me summen på alle som bur i Noreg, blir det rundt 55 kroner per person. Men staten har også andre utgifter knytte til kongehuset, skriv Ung.Forskning.no.
Nesten 30 millionar av pengane går til kongeparet og kronprinsessa. Desse pengane blir kalla apanasje og skal dekkja private utgifter. Resten går til det kongelege hoffet. Der jobbar tilsette som hjelper kongefamilien med arbeidet deira.
Hemmeleg utgift
I tillegg er det sett av rundt 160 millionar kroner til mellom anna vedlikehald av bygningar, kongeskipet og reiser. Til saman blir det om lag 467 millionar kroner, ifølgje artikkelen. Staten brukar også pengar på å passa på kongefamilien, men kor mykje det kostar, er hemmeleg. Derfor veit me ikkje den nøyaktige totalsummen.
Professor Jarle Møen ved Noregs handelshøgskule seier til Ung.Forskning.no at Noreg ville hatt utgifter til ein president òg, dersom me ikkje hadde hatt konge.
– Presidenten skal ha ein stab, ein presidentbustad og vakthald, seier han.
