Møt påfugleedderkoppen!

Evolusjonsbiolog Hanna Nyborg Støstad har skrive ei kul bok om evolusjon. Framtida Junior har fått visa fram nokre av dei rare dyra du møter i boka «Eventyrlige dyr». I dag er det dei fargerike påfugleedderkoppane sin tur.

Illustrasjon: Colourbox, Kollasj: Framtida Junior

Du trur kanskje at alle edderkoppar er skumle svarte kryp? Men edderkoppar kan òg vera morosame og søte!

FORFATTAR: Hanna Nyborg Støstad er evolusjonsbiolog. No har ho skrive boka «Eventyrlige dyr» saman med illustratør Simon Dahle Nyhus.

I Australia finn du påfugleedderkoppen. Ho er bitte liten, berre eit par millimeter stor, og kan fint få plass på lillefingerneglen din.

Hoene er gråbrune, men hannane er fulle av fargar. Rumpene deira er dekt av små fargesprakande skjel. Nokon har knallblå og oransje rumpe, andre har grøn rumpe med lilla prikkar, medan nokon har flotte regnbogefargar.

(Utdrag frå «Eventyrlige dyr», Cappelen Damm)