1. Libanon har om lag like mange innbyggjarar som Noreg, men Noreg er 38 gonger større enn Libanon. I Libanon bur 5,8 millionar innbyggjarar på 10.230 kvadratkilometer.
2. Libanon er som Noreg eit svært fjellrikt land som har fått namnet sitt frå det fønikiske ordet «lbn» som tyder kvit. Dette refererer sannsynlegvis til dei snødekte libanesiske fjella. Den høgaste toppen, Qurnat as-Sawda’, er 3088 meter. Galdhøpiggen i Noreg er litt mindre, 2469 meter høg.
3. Libanon grensar til Syria og Israel. Landet har også kystline mot Middelhavet, og mellom fjella er det fruktbare dalar. Den største elva i Libanon er 23 kilometer lang og blir kalla både Abrahamselva og Adoniselva. Den renn gjennom dalen som heiter Nahr Ibrahim og munnar ut i Middelhavet.
4. Libanesarar er kjende for å vera eit svært raust og gjestfritt folkeslag. Libanon er det landet i verda som har teke i mot mest flyktningar. I 2024 var det registrert om lag 1,25 millionar flyktningar i Libanon, dei fleste frå Syria. Til samanlikning bur det om lag 130 000 flyktningar i Noreg.
5. Befolkninga i Libanon er samansett av folkegrupper med svært ulike synspunkt både politisk, religiøst og kulturelt, noko som utløyste borgarkrig i landet, frå 1975 til 1990. Om lag 95 prosent av det libanesiske folket er arabarar og 4 prosent armenarar. Om lag 50 prosent er muslimar, 45 prosent kristne og 5 prosent drusarar. Drusarar er ei strengt lukka religiøs gruppe.
6. Internasjonalt har den libanesiske millitante islamistgruppa Hizbollah vore inn og ut av konflikt med nabolanda Israel og Syria. Då Israel i februar i år drap øvste leiaren i Iran, Ayatollah Ali Khamenei, trigga dei på nytt Hizbollah, som også rekna Khamenei som sin øvste leiar. Dei fleste libanesarar blei sterkt fortvila då Hizbollah drog heile landet inn i ein ny krig under hemnangrepa på Israel 2. mars 2026. Mange uskuldige folk og barn er no på flukt og lid.
7. Levekåra for barn i Libanon er for tida ikkje gode. Om lag 390.000 er på flukt frå krigen og det er mangel på helsehjelp, vatn og vern. Dei får heller ikkje gå på skule. Mange organisasjonar jobbar for å hjelpa desse barna for at dei skal bli trygge og få det godt igjen.
8. I fredstid er Libanon eit ynda mål for turistar. Landet er rikt på oldtidsminner, mellom anna frå steinalderen, romartida og mellomalderen. Turistar kan ta båtturar, dykka, besøka templer, grotter og gå fotturar i fjella.
9. Nasjonaldyret til Libanon er stripehyena! Den symboliserer motstandskrafta og tilpasningsevna til det libanesiske folket. I motsetnad til andre hyenar lagar stripehyena lite lyd, og den kan nærast dobla kroppsstorleiken sin om den blir redd og reiser bust.
10. Det finst fleire libanesarar i utlandet enn det som bur i Libanon. Kanskje så mykje som 15 millionar bur i andre land som Brasil, Canada og Frankrike. Ein av dei mest kjende eksil-libanesarane er menneskerettsadvokat Amal Clooney. Saman med ektemann og skodespelar George har ho starta ein veldedig organisasjon som mellom anna samarbeider med Unicef for å betra vilkåra for flyktningebarn i Libanon.
