EU har laga ein ny app for kontroll av alder på nettet, som er klar og snart blir tilgjengeleg for bruk, skriv Reuters.
EU-kommisjonens leiar Ursula von der Leyen sa på eit pressemøte onsdag at dei har laga appen for å halde digitale plattformer som ikkje beskyttar barn, ansvarlege.
– Nettselskap kan stole på vår aldersverifisering, så det er ikkje lenger noka unnskyldning. Det er berre å nytte den, sa von der Leyen.
Målet med appen er å hindre at mindreårige får tilgang til nettsider med uønskt innhald.
Etter Australia innførte aldersgrense for sosiale medium, har fleire land no vurdert liknande tiltak, inkludert Noreg.
– Heilt trygg i bruk
Appen blir snart tilgjengeleg for alle, etter å ha blitt testa i fleire EU-land.
– Det er foreldra som skal oppdra barna sine, ikkje plattformene, seier von der Leyen.
Appen krev at ein lastar opp pass eller ID-kort, men det vil vere mogleg å vere anonym, ifølge von der Leyen.
Ho seier at appen har dei aller høgaste sikkerheitskrava i verda.
Skritt i riktig retning
Digitaliseringsminister Karianne Tung (Ap) seier til VG at appen er eit viktig skritt i riktig retning for å beskytte barn på nett.
– Regjeringa jobbar med å få innført ei aldersgrense på sosiale medium, og har tett dialog med EU-land som ligg langt framme i dette arbeidet, særleg Danmark og Frankrike, seier ho.
Det samarbeidet meiner ho gir verdifull erfaring når dei skal vurdere løysingar for trygg aldersverifisering i Noreg.
Førebels er det opp til plattformene å nytte appen EU har laga, og det er endå ikkje innført lovendringar.
