Diplom-Is brukar framleis Eskimonika

Diplom-Is endra logoen sin fordi mange reagerte på at dei brukte ei inuittjente som figur i reklame for isen. Men dei brukar framleis den gamle logoen.

FAKTA: Kven er inuittane?
  • Inuittar er urbefolkning som lever på Grønland, i Alaska og Canada.
  • Ordet «inuit» er grønlandsk og betyr «menneska».
  • Tradisjonelt var inuittane eit nomadefolk som levde av jakt og fiske.
  • I dag held nokon fast på tradisjonane, men bruker likevel moderne hjelpemiddel som snøskuterar og skytevåpen.

(Kjelde: Wikipedia, Store Norske Leksikon)

LES FAKTALUKK FAKTA

For tre år sidan endra Diplom-Is figuren dei kalla Eskimonika til den nye figuren som har fått namnet «Diplom-Is jenta Iselin». Den nye figuren er framleis gul og raud, men har fått av seg selskinnskleda til inuittane.

Den gamle logoen med Eskimonika som frontfigur. Foto: Skjermdump / YouTube

Men no viser NRK sine undersøkingar at Diplom-Is framleis brukar den gamle logoen på ispakkar i butikken, på isbil-appen for forbrukarar, i reklamefilm på nettsida og YouTube, og på bilar.

– Me ser poenget, og erkjenner at dette har teke lengre tid enn planlagt, seier Martin Kjekshus til NRK. Han er administrerande direktør i Diplom-Is.

Den nye logoen med Diplom-Is jenta Iselin som frontfigur. Foto: Skjermdump / YouTube

Vil bruka opp emballasje

Martin Kjekshus seier også at gammal emballasje vil bli brukt opp før ny dukkar opp.

– Me ønskjer ikkje å kasta emballasje som heilt fint kan brukast berre fordi han har gammal logo, seier direktøren.