Barnas Klimapanel 2021
Dei åtte som vart valt til å sitja i Barnas Klimapanel 2021 er Milla, Emanuel, Dina, Ulrik, Ane, Olivia, Josefine og Jakob.
– Eg vart veldig glad og stolt då eg fann ut at eg fekk vera med. Eg hadde aldri trudd at eg fekk plassen, seier Jakob.
Etter å ha vore miljøagent sidan 2018, fekk han i år éin av åtte plassar i Barnas Klimapanel. Der skal han representera norske born ovanfor dei som bestemmer i Noreg.
Noko av det han håpar å få til som medlem i Barnas Klimapanel, er å engasjere folk i klimakrisa.
– Eg skal prøva å representere Barnas Klimapanel på ein god måte. Eg håpar at me kan få klima og miljø inn i læreplanen, og etter kvart få redusera og stoppa oljeboringa.
– Eg synest jorda er så fin
Jakob fortel at han har vore interessert i miljø og klima lenge, og at han mellom anna starta å plukka boss allereie då han var fem år.
I Gloppen, der han bur, er han omkransa av fjordar og fjell. Det gjer noko med ein.
– Eg synest jorda er så fin, seier Jakob og fortsetter:
– Eg hadde lese mykje og sett reklamar som gjorde at eg begynte å bry meg om klimaet. Vennene mine er også veldig interessert i det. Og så må eg nemna Greta Thunberg, som er eit forbilde.
