– Eg er ikkje så glad i fisk. Når vi et fisk heime er det mest torsk og laks. Einaste fisken eg eigentleg likar er laks, seier Jens.
Jens og Robert er i gang med å lage spinatsuppe med torsk.
Rundt kjøkkenøya er det fem matstasjonar. Det skal lagast spinatsuppe, tomatsuppe med blåskjel, lakse-wok, sushi og tacolefse. Alle rettar er med enten laks, torsk eller sei.
– Det er dette som må til
Rune Sandø kjem frå Unge kokker og er ekspert på å formidle matkunnskap og folkehelse for barn og ungdom.
– Det er slik som dette som må til for at barn skal ete meir fisk, seier Rune Sandø.
– Barna må sjå, føle, ta og lukte for at dei skal like maten.
Rune viser korleis ein tek av skinnet på laksen.
– Er det nokon som vil ta på fiskeskinnet? undrar Rune, og viser skinnet til elevane.
– JA! ropar dei og strekker seg mot det.
– Det er litt ekkelt, seier Jenny.
– Men det ser ut som sølv, seier Marius og stryk handa over. – Det er kjempedeilig!
Rune viser korleis sushi-gruppa skal gjere det. Dei står rundt bordet og følgjer med.
– Når eg instruerer viser eg det ein gong, og så får dei gå rett på og lære av kvarandre.
Godt jobba!
Litt over ein time er fem innbydande rettar ferdige.
– Mat er sosialt. Vi må lage mat saman, for å gjere det interessant, seier Rune.
Første retten dei et er spinatsuppa med torsk. Jens og Robert, kokkane bak suppa, er godt nøgde.
– Ta opp ein tommel om de likar det? seier Robert til dei andre.
– Dei likte det, seier han til Jens. – Dei viste tommel opp.
Robert smakar på suppa han har laga.
– Det var godt! Jens og eg gjorde ein god jobb, konstaterer han.
- LES OGSÅ: Slik lagar du spinat- og potetsuppe
Debuterer med blåskjel
Jenny har aldri smakt blåskjel før, og er litt skeptisk.
– Kanskje du vil prøve eit blåskjel før du et suppa? seier Rune.
Han gir henne eit skjel. Ho tek i mot og puttar det i munnen. Alle rundt henne klappar og heiar.
– Det smakar litt som det luktar. Det var godt, seier Jenny.
Brettet med tacolefsa med godt krydra sei går unna.
– Tacolefsa er god, du smakar ikkje fisken, seier Mio.
– Det byrjar å bli stille rundt bordet. Betyr det at de er i ferd med å bli mette? spør Rune.
– Ja, konstaterer elevane. No er dei stappmette!
– Men eg kan gjerne få litt meir, seier Robert.
