– No er eg inne i mitt andre skuleår her i Spania, seier Mathilde.
Mathilde er 12 år og går i 7. klasse på Den Norske Skolen i Málaga (DNS Málaga).
– Eg stortrivst her, seier ho.
– Akkurat no er eg litt i den situasjonen der mamma, pappa og eg diskuterer om vi skal reise tilbake til Noreg, når eg skal byrje på ungdomskulen neste år.
Akkurat det er vanskeleg å bestemme seg for. Ho likar seg veldig godt på skulen, men så er også saknet etter mormor, morfar og venner der.
I Spania har ho også familie. Farmor, farfar, tante og onkel og kusine og fetter bur i Spania.
Starta YouTube-kanal
Hennar store interesse er riding og klartring. Ho er med i ein rideklubb. I tillegg klatrar ho ein del saman med faren sin. Då gjerne i grottene som det er mange av i Spania.
For ikkje lenge sidan starta ho ein YouTube-kanal. Den heiter Mathilde sportygirl, der ho viser livet sitt med mellom anna riding, klartring og andre ting som skjer i kvardagen i Spania.
Mathilde redigerer filmane sine sjølv, og pappa hjelper henne med å filme.
– Målet med YouTube-kanalen er å vise kva eg gjer i livet mitt.
Badar ikkje så ofte
For livet i Spania er kanskje ikkje så veldig forskjellig frå livet i Noreg.
– Vi er så og seie aldri på stranda og bader. Det gjer vi berre når vi har besøk frå Noreg, seier ho.
Heime i huset der ho bur har dei eit stort felles basseng med naboane, men ho badar ikkje kvar dag, noko vi i kalde Noreg kanskje trudde ho gjorde. Kanskje ho har vorte som ein innfødt?
– Eg er ikkje lei av bading. Det er gøy, men det skjer ikkje kvar einaste dag, seier ho.
