Arrangerer MGP for KI-musikk

Det blei nyleg kjend at det ikkje blir tillate med songar laga med KI under Melodi Grand Prix. No har ei eiga musikkonkurranse for KI-genererte låtar sett i gang.

Melodi Grand Prompt
  • Norsk musikkonkurranse for KI-låtar.
  • Konkurransen går føre seg på ei nettside der finalistar blir stemde fram kvar helg – så langt er to klare.
  • Finalen er i februar og blir strøyma på YouTube – her vil det vere mellom 10 og 14 finalistar.

Kjelde: nrk.no og melodigrandprompt.ai

LES FAKTALUKK FAKTA

Melodi Grand Prompt er den første norske konkurransen for musikk laga med KI, skriv NRK.

Alle som deltek med låtar i Melodi Grand Prompt, må ha laga musikken med KI.

– I dag finst det ingen stader der ein kan vise fram KI-musikken sin, og det er vanskeleg å få folk til å høyre på han, seier arrangør og artist Lars Kilevold.

Kilevold meiner at det kjem til å vere mykje betre låtar i Melodi Grand Prompt enn i ein gjennomsnittleg Melodi Grand Prix-finale. 

Marius Asp, musikkmeldar i VG, er skeptisk. Han seier til NRK at det ikkje gir meining at KI-musikk skal bli vurdert på lik line med kunst som er laga av menneske.

Musikkmeldaren meiner at poenget med musikken er den menneskelege faktoren.