Allereie då Max var fire år sydde han ein kjole til søstera si og fortalde foreldra sine at han var klesdesignar.
Mora tok dermed til med å lære han det ho kunne om å sy. Då Max var fem år begynte han å gå på undervisning for å lære meir og utvikle ferdigheitene sine.
Verdsrekord nummer ein
I 2023, då Max var sju år gammal, hadde han allereie sydd sin eigen kolleksjon med klede. Denne kolleksjonen viste han fram på moteveka i den amerikanske byen Denver.
Med denne moteoppvisninga blei han den yngste personen nokosinne til å ha runway show. Runway show er når ein designar viser kleda sine på modellar som går på ein catwalk – ei lang, opphøgd scene.
Verdsrekord nummer to
Våren 2026 skulle Max ta ein ny verdsrekord. Han designa 15 antrekk av gjenbruksmateriale. Gjenbruksmateriala var mellom anna ei Hermes-veske og ein militærfallskjerm.
Desse 15 gjenbruksantrekka viste han fram under Paris Fashion Week. Med det blei han den yngste runway show-designaren som nokosinne har delteke på Paris Fashion Week, som blir rekna som verdas største moteveke.
Gjennom designa sine vil Max vise folk kor vakre gjenbruksmateriale kan bli, i staden for at dei hamnar i søppelet.
– Det er jo mykje betre for miljøet vårt, seier Max i boka Guinness World Records 2027.
Verdsrekord nummer tre og fire
I september tok Max Alexander to ny verdsrekordar. Han blei verdas raskaste til å tre ein automatisk symaskin, noko han gjorde på 10 sekund og 16 hundredelar. Å tre ei symaskin vil seie at ein plasserer trådar der dei skal vere i maskina, så ho er klar til å sy.
Den unge designaren blei også den yngste noko sinne til å gi ut ein eigen tekstilkolleksjon. Max har nemleg designa stoff i samarbeid me tekstilmerket Mood, som no er ute for sal.
Kjendisstylist og eigen nettbutikk
Max har også sin eigen klesbutikk på nett der han sel klede som han har designa – alt frå pysjar til kjolar. Denne nettbutikken starta han allereie då han var fire år.
Verdsrekordhaldaren har også kledd opp og styla kjendisar, som mellom anna skodespelaren Sharon Stone.
Samstundes som han har ei brennande interesse for mote, drøymer Max også om å bli restauranteigar, ingeniør og å eige ein bilvask.
– Eg vil vere ein mannleg Barbie med 250 forskjellige karrierar og eit eige antrekk til kvar av dei.
