Kristi himmelfartsdag er ei kristen høgtid som blir feira til minne om at Jesus Kristus, ifølgje forteljingane i Det nye testamentet, vart teken opp til himmelen.
Himmelfarten skal ha skjedd 40 dagar etter at Jesus viste seg for disiplane etter oppstoda. Kristi himmelfartsdag blir feira torsdagen som kjem 39 dagar etter første påskedag. Dersom første påskedag blir kalla dag nummer éin, blir Kristi himmelfartsdag dermed dag nummer førti.
Mange i Noreg har fri denne dagen, og nokon tek også fri på fredagen for å få ei ekstra lang helg.
Kva skjedde ifølgje Bibelen?
I Bibelen står det at Jesus viste seg for disiplane sine fleire gonger etter at han stod opp frå dei døde på første påskedag.
Til slutt samla han disiplane før han vart løfta opp til himmelen. Kristne meiner at Jesus då drog tilbake til Gud.
Har vore feira i veldig mange år
Kristi himmelfartsdag har vore markert av kristne i over 1500 år. Dagen er ein heilagdag i mange land, mellom anna i Noreg.
For mange kristne handlar dagen om håp og tru. Nokon meiner også at dagen markerer overgangen mellom påske og pinse.
