– Å få låne utstyr i BUA er jo veldig lurt fordi det er gratis. Då kan alle låne ting dei ikkje har sjølv. Viss det hadde kosta pengar, hadde kanskje ikkje så mange barn fått prøve så mange ulike aktivitetar, seier Herman Olsen Fjell.
– Det er gøy å låne ting, seier Martin.
Mykje forskjellig
Saman med veslebror Olav har Herman og Martin lånt både vinter- og sommarutstyr hos BUA.
– Eg har lånt minibmx-sykkel, slalåmski, hjelm, briller, sparkesykkel, rulleski, sko til langrennski der tidlegare, seier Herman.
– Eg har lånt minibmx, skateboard, hoppestokk, langrennski, akematte, hopp til bmxen og stigegolf, fortel Martin.
Heile familien
Denne vinterferien har heile familien deira lånt slalåmski frå BUA. Gutane si mor, Mette Terese Olsen, fortel at dei besøker BUA ofte. Dei har brukt tilbodet heilt sidan BUA Stord starta med utlån.
– Det er flott at vi kan prøve ulike aktivitetar – og så kan ein heller kjøpe det ein likar aller best etter kvart, seier ho.
