Kodetimen
Kodetimen er ein skuletime med programmering, ferdig tilpassa for barn frå barnehage til vidaregåande skule. Læraren treng ikkje å ha erfaring med programmering.
Målet er la elevene sjå at dei kan læra å meistra datamaskinen som eit skapande verktøy.
Kodetimen er ein skuletime med programmering som mange skular har vore med på denne veka.
– Me har fått programmert med figurar frå Minecraft, Star Wars og Angry Birds, fortel Viljar Rusten Steinsvåg i 6.klasse ved Langeland skule på Stord.
Ved å leggja inn ulike kommadoar får elevane flytta figurane gjennom ein labyrint.
– Me får kombinera det å jobba og læra med ha det kjekt. Eg anbefaler verkeleg dette til alle som får sjansen til å vera med, seier Viljar.
– Lett å læra
Oppgåvene som elevane får er forklart med videoar.
– Det er veldig godt forklart, synest Viljar.
– Det er ikkje vanskeleg, eg forstår engelsk, seier Veslemøy Rønnekleiv Helland.
Og viss engelsken skulle bli vanskeleg, så er videoen tekstane på norsk.
– Kjekt med Scratch
Adrian Bergseth Solvoll har koda før på fritida med hjelp av Scratch. Her er det mogleg for born og unge å laga sine eigne animasjonar og dataspel.
– Eg har laga ein animasjon med eit eple og ein penn, frå Youtube-videoen Pineapple Apple Pen, smiler han.
Sjå video om kva Scratch er for noko under her:
Ønskjer å bruka pcen meir i skulen
Både Adrian og Viljar kunne gjerne tenkt seg å få bruka pc meir i skulen.
– Tenk om me kunne få bruka pcen meir i matte, i staden for skriva så mykje for hand, seier Adrian.
– Eg blir sliten i handa av å skriva for hand, seier Viljar.
Mathilde Halland Nordtveit og Veslemøy Rønnekleiv Helland kunne òg tenkt seg å få vera meir på pc.
– Det hadde vore fint å få skriva på pc, i staden for å skriva for hand, seier Veslemøy.
